子女最崇拜係父親而非老師

2007-06-18 cho sir 子女最崇拜係父親而非老師

　　欲投資成功，唔係換車、換樓，而係換腦！1970年我老曹在《明報》晚報時天天講、日日講，唔好再儲蓄喇，要投資（今天叫理財）。近年我老曹講得最多係做自己金錢嘅主人，要分析唔好盲從，學睇趨勢而唔係學睇走勢（任何人花三個月時間已能了解走勢，如果發達咁簡單，點解社會上仍然咁少有錢人？）。香港人最大缺點係想賺錢又唔想投資！最好係講個冧把畀佢買，自己唔肯做功課又喜歡怪責別人。如果你只想賺錢而唔想做功課，結果一定賺唔到大錢。各位不應該因我老曹推介而做決定，任何事物應自己深入了解，而非怪責別人。

　　嚴父慈母响現代社會變得角色混淆，因為母親已成為返工一族，令父親嘅角色在現代社會裏不知點樣好！在古代社會係養不教，父之過，即母親負責養育、父親負責教導。今天社會父親可能忙於應酬，而將教導嘅責任交畀學校，係今天社會出現大量問題嘅因由。心理學家指出，子女最崇拜嘅係父親而非老師。子女的未來極受父親嘅期望所影響。今天做父親自然不可再信「棒下出乖兒」理論，而須對子女循循善誘、亦師亦友。如果你嘅子女有問題，第一時間唔係搵父親商量，你已是一個失敗的父親。如果你對子女態度有如上司與下屬，亦十分失敗。如果你只係子女嘅「提款機」而疏於管教，亦非常失敗。做一個明白事理的父親，做子女的導師，亦係子女的好朋友，而唔係「嚴父」，保證你有一個健康快樂的家庭。上述才是人生最成功的投資！（寫於父親節下午）